Kurs.Ge

თელავში აეროპორტი „მიმინო“ შიდა რეისებს პირველად განაახლებს

03.06.2022

თელავში ერეკლე მეორის სახელობის აეროპორტი „მიმინო“, 30 წლის შემდეგ, ზაფხულის ბოლოს, თვითმფრინავით შიდა რეისებს პირველად განაახლებს.

შიდა ფრენები ბათუმისა და მესტიის აეროპორტების მიმართულებით 16-ადგილიანი თვითმფრინავით განხორციელდება. საწყის ეტაპზე აეროპორტში კვირაში 4 რეისი განხორციელდება.

აეროპორტს ასევე შესაძლებლობა აქვს, მიიღოს საჰაერო ხომალდები საქართველოს ნებისმიერი აეროპორტიდან და შეასრულოს როგორც ჩარტერული, ასევე რეგულარული ფრენები.

აეროდრომის რეაბილიტაციაზე, რომელიც გასულ წელს დაიწყო, 3 მილიონი ლარი დაიხარჯა. ფრენების ზუსტი ფასი ჯერ დადგენილი არ არის, თუმცა ის იმ ფასების დიაპაზონში იქნება, რაც ქვეყანაში შიდა ფრენებზეა, - აცხადებს „მიმინოს“ მფლობელი, „საქართველოს საავიაციო უნივერსიტეტის“ ხარისხის უზრუნველყოფის სამსახურის უფროსი, დავით ტეფნაძე.

საქართველოს საავიაციო უნივერსიტეტის მფლობელობაში მყოფი ქალაქ თელავში მდებარე ერეკლე მეორეს სახელობის აეროპორტი „მიმინო“ 2012 წელს გაიხსნა. აეროპორტის ტერიტორიაზე აშენდა თვითმფრინავების ტექნიკური მომსახურების საწარმო, სანავიგაციო კოშკურა, აეროვაგზლის შენობა მგზავრებისათვის და საერთო საცხოვრებელი პილოტ-ინსტრუქტორებისა და საინჟინრო-ტექნიკური პერსონალისთვის.

უკან დაბრუნება