2022 წლის მაისში თბილისში საცხოვრებელი ბინების ტრანზაქციების რაოდენობამ 3,398 ერთეული შეადგინა, რაც წინა წლის მაისთან შედარებით 56%-იანი ზრდაა. ბაზრის ზომა კი - 69%-ით, 168 მილიონ აშშ დოლარამდე გაიზარდა. ამის შესახებ Colliers Georgia-ს საცხოვრებელი ბინების ბაზრის განახლებულ მიმოხილვაშია აღნიშნული. მონაცემების მიხედვით, თბილისში ახალ პროექტებში ტრანზაქციების 66%-იანი ზრდა ფიქსირდება. „2022 წლის მაისში, თბილისში ახალ პროექტებში ტრანზაქციების 66%-იანი ზრდა ფიქსირდება, რაც ძირითადად განპირობებულია მედიუმ და პრემიუმ სეგმენტების მნიშვნელოვანი ზრდით. ძველ პროექტებში კი მაჩვენებელი 39%-ით არის გაზრდილი, 2021 წლის მაისთან შედარებით."

-

2022 წლის მაისში საცხოვრებელი ბინების ტრანზაქციების რაოდენობის მკვეთრი ზრდა დაფიქსირდა ასევე ბათუმში. გასული წლის მაისთან შედარებით ტრანზაქციების მაჩვენებელი 70%-ით, 1,436 ერთეულამდე გაიზარდა, ბაზრის ზომა კი - 66%-ით, 59 მილიონ დოლარამდე გაიზარდა. ბათუმში ახალაშენებულ ბინებზე ტრანზაქციების რაოდენობა 69%-იანი, ძველ ბინებზე კი - 74%-იანი ზრდა დაფიქსირდა.

„ბათუმში ტრანზაქციების რაოდენობის მკვეთრი ზრდა ახალაშენებული ბინების ყველა სეგმენტში დაფიქსირდა. ეკონომ სეგმენტის ბინებზე ტრანზაქციების რაოდენობა 63%-ით გაიზარდა, მედიუმ და პრემიუმ ბინებზე კი - 71% და 84%-ით, შესაბამისად. ბათუმში 2022 წლის მაისში ახალაშენებული ბინების საშუალო შეწონილი ფასი უმნიშვნელოდ შემცირდა და კვ.მ-ზე 873 აშშ დოლარი შეადგინა. ძველ ბინების შემთხვევაში კი 9.7%-იანი კლება დაფიქსირდა და მაჩვენებელი 621 აშშ დოლარს გაუტოლდა“, - აღნიშნულია საცხოვრებელი ბინების განახლებულ მიმოხილვაში.