Kurs.Ge

რაჭაში მუსიკალური ფესტივალი „როკვა“ 29-31 ივლისს გაიმართება

23.06.2022

ROKVA მუსიკალური ფესტივალია, რომელიც შოვში, რაჭაში, 29-31 ივლისს გაიმართება. მუსიკის ფესტივალი „როკვა“ რაჭაში 2019 წლიდან ყოველწლიურად იმართება და წელს პირველად ის სამდღიანი იქნება.

ROKVA ყოველ წელს სხვადასხვა კონცეფციით მასპინძლობს მსმენელს. წლევანდელი პროექტი - ჯადოსნური მთა/შოვი - ქართველი არტისტებს ეთმობა. მუსიკასთან ერთად, სტუმრებს დახვდებათ ადგილობრივ მეწარმეთა პროდუქციის გამოფენა-გაყიდვა, ფოტო-გამოფენა, თორნიკე სხიერელის ვორქშოფი რაჭული ფოლკლორის თემაზე და ,,არტელი რაჭას'' ინსტალაციები. ტერიტორიაზე იქნება ბარები და სხვადასხვა გასართობი საშუალებები როგორც ზრდასრულებისთვის, ასევე ბავშვებისთვის.

წელს სამდღიანი აბონიმენტის ფასი 130 ლარიდან 190 ლარამდეა. 1 დღის ბილეთის ფასი და 60 ლარიდან 100 ლარამდე მერყეობს. ბილეთები ამჟამად ონლაინ იყიდება, თუმცა, უახლოეს მომავალში ფიზიკური გაყიდვების წერტილიც ამოქმედდება.

ბილეთების შეძენა: >>

შეგახსნებეთ, თბილისიდან რაჭაში ჩასვლა უკვე 3.5 საათშია შესაძლებელი. ახალი გზის მშენებლობა 2021 წლის სექტემბერში დასრულდა. ახალი გზა ერთმანეთთან აკავშირებს ორ რეგიონს – იმერეთსა და რაჭას. გზა საჩხერიდან იწყება, გაივლის სოფლებზე: სარეკი, ქვემო ხევი, უზუნთა, შქმერი, ბოყვა, კვაშხიეთი, ზუდალი და საბოლოოდ უერთდება ამბროლაური-ონის გზას, რომელიც ქალაქ ამბროლაურიდან დაშორებულია 20 კმ-ით, ხოლო ქალაქ ონიდან 5 კმ-ით. გზის დიდი ნაწილი ტყიან ზონაში, მდინარე ხეორის ხეობაში გადის და ზღვის დონიდან 1000-1500 მეტრის სიმაღლეზე მდებარეობს. ახალი გზის მშენებლობის პროექტი სახელმწიფო ბიუჯეტიდან დაფინანსდა და მისმა ღირებულებამ დაახლოებით 110 მილიონი ლარი შეადგინა.

უკან დაბრუნება